പരവൂർ: എറണാകുളം ജംഗ്ഷൻ യാർഡിൽ ട്രാക്ക് നവീകരണ പ്രവർത്തനങ്ങൾ നടക്കുന്നതിനാൽ ട്രെയിൻ ഗതാഗതത്തിൽ നിയന്ത്രണങ്ങൾ ഏർപ്പെടുത്തി.
ഇന്നു രാത്രി തന്നെ ട്രാഫിക് ബ്ലോക്ക് ആരംഭിക്കുന്നതിനാൽ ഗുരുവായൂർ - ചെന്നൈ എഗ്മോർ എക്സ്പ്രസ്, മാവേലി, ചെന്നൈ എസി സൂപ്പർഫാസ്റ്റ് ഉൾപ്പെടെയുള്ള പ്രധാന ട്രെയിനുകൾ കോട്ടയം വഴി തിരിച്ചുവിടും. ആലപ്പുഴ റൂട്ടിലുള്ള സ്റ്റേഷനുകളിൽ സ്റ്റോപ്പ് ഒഴിവാക്കുന്നതിനാൽ യാത്രക്കാർ ജാഗ്രത പാലിക്കണമെന്ന് റെയിൽവേ അറിയിച്ചു.
കോട്ടയം വഴി തിരിച്ചു വിടുന്ന ട്രെയിനുകൾ
ഗുരുവായൂർ – ചെന്നൈ എഗ്മോർ (16128): ഇന്ന് മുതൽ 26 വരെയുള്ള 16 ദിവസങ്ങളിൽ ഈ ട്രെയിൻ കോട്ടയം വഴി തിരിച്ചുവിടും. കോട്ടയം, ചെങ്ങന്നൂർ, തിരുവല്ല, ചങ്ങനാശേരി എന്നിവിടങ്ങളിൽ സ്റ്റോപ്പ് ഉണ്ടാകും.
മാവേലി എക്സ്പ്രസ് (16603): ഇന്ന്, 15 തീയതികളിൽ മംഗളൂരുവിൽനിന്നു പുറപ്പെടുന്ന മാവേലി എക്സ്പ്രസ് കോട്ടയം വഴി തിരിച്ചുവിടും. എറണാകുളം ടൗൺ, കോട്ടയം, ചങ്ങനാശേരി, തിരുവല്ല, ചെങ്ങന്നൂർ സ്റ്റേഷനുകളിൽ സ്റ്റോപ്പ് ഉണ്ടാകും.
ചെന്നൈ – തിരുവനന്തപുരം എസി സൂപ്പർഫാസ്റ്റ് (22207): ഇന്ന്, 15, 22 തീയതികളിൽ ചെന്നൈയിൽനിന്നു പുറപ്പെടുന്ന ട്രെയിൻ കോട്ടയം വഴി ഓടും. എറണാകുളം ടൗൺ, കോട്ടയം, ചെങ്ങന്നൂർ എന്നിവിടങ്ങളിൽ അധിക സ്റ്റോപ്പ് അനുവദിച്ചു.
കൊച്ചുവേളി – മംഗളൂരു അന്ത്യോദയ (16355): നാളെ, 14, 16, 21, 23 തീയതികളിൽ കായംകുളത്തിനും എറണാകുളം ടൗണിനുമിടയിൽ കോട്ടയം വഴി തിരിച്ചുവിടും. ചെങ്ങന്നൂർ, കോട്ടയം, എറണാകുളം ടൗൺ എന്നിവിടങ്ങളിൽ നിർത്തും.
സമയക്രമത്തിൽ മാറ്റം
യാർഡിലെ ജോലികൾ കാരണം ചില ട്രെയിനുകൾ വൈകി ഓടാനും സാധ്യതയുണ്ട്.
മംഗളൂരു ജംഗ്ഷൻ – തിരുവനന്തപുരം നോർത്ത് അന്ത്യോദയ (16356) ഇന്ന്, 15, 22 തീയതികളിൽ 30 മുതൽ 40 മിനിറ്റ് വരെ വൈകും.
മംഗളൂരു സെൻട്രൽ – തിരുവനന്തപുരം മാവേലി എക്സ്പ്രസ് (16603) നാളെ മുതൽ 26 വരെയുള്ള തീയതികളിൽ 40 മിനിറ്റ് വൈകിയായിരിക്കും ലക്ഷ്യസ്ഥാനത്ത് എത്തുക.
ട്രാക്ക് നവീകരണം അത്യാവശ്യമായതിനാലാണ് നിയന്ത്രണങ്ങൾ ഏർപ്പെടുത്തിയതെന്നും യാത്രക്കാർ റെയിൽവേയുമായി സഹകരിക്കണമെന്നും അധികൃതർ അഭ്യർഥിച്ചു.